බලශක්තියෙන් සුරක්ෂිත ශ්‍රී ලංකාවක් කරා

වර්ෂ 2030 වන විට මෙරට නිපදවන විදුලි බලයෙන් 70% ක් පුනර්ජනනීය බලශක්තිය හරහා ලබාදීම රජයේ ප්‍රතිපත්තිමය ඉලක්කයයි.  ඒ සඳහා මෙතෙක් ජල විදුලිය, සුළං විදුලිය, සූර්ය විදුලිය හා ජෛව බලශක්තිය මඟින් විශාල දායකත්වයක් ලබා දුන් අතර වර්ෂ 2030 වන විට අක් වෙරළ සුළං බලශක්තිය (Off-shore wind) මඟින් මෙගාවොට් 1,000 ක් ජාතික ජාලයට එක් කිරීමට නියමිතය.  අක් වෙරළ සුළං ව්‍යාපෘති ගොඩබිම නොව මුහුද මත ඉදි කරන අතර ශ්‍රී ලංකාවේ එවැනි ව්‍යාපෘති කිරීමේ හැකියාව පිළිබදව ලෝක බැංකු අධාර වැඩසටහනක් හරහා අධ්‍යයනය කෙරුණි.  එම අධ්‍යයන වාර්තාව මඟින් නොඟැඹුරු මුහුදේ සවිකරන සුළං ටර්බයින හරහා මෙගාවොට් 22,000 ක විභවයක් සහ ගැඹුරු මුහුදේ සවිකරන පාවෙන ටර්බයින හරහා මෙගාවොට් 17,000 ක විභවයක් ද සහිතව අක් වෙරළ සුළං තාක්ෂණය හරහා විදුලිය නිපදවිය හැකි බව අනාවරණය කෙරුණි. මෙම අධ්‍යයන වාර්තාව බලශක්ති ක්ෂේත්‍රයේ ප්‍රවීණයන් වෙත ඉදිරිපත් කිරීම ලෝක බැංකු උපදේශක Jary Vayiynen හා Mark Leybovrne මහත්වරුන්  විසින් සිදු කෙරුණි. එම අවස්ථාව බත්තරමුල්ල වෝටර්ස් එජ් පරිශ්‍රයේදී 2022/02/07 සිදු වූ අතර විදුලිබල හා බලශක්ති අමාත්‍යාංශ ලේකම් එම් පී ඩී යු කේ  මාපා පතිරණ මහතා, ශ්‍රී ලංකා සුනිත්‍ය බලශක්ති අධිකාරියේ සභාපති රංජිත් සේපාල මහතා, අධ්‍යක්ෂ ජනරාල් අතුල ජයතුංග මහතා හා ආරාධිත රාජ්‍ය නිලධාරීන්  මෙම අවස්ථාවට සම්බන්ධ විය.

හම්බන්තොට බැරුතන්කන්ද පිහිටි ජාතික පුනර්ජනනිය බලශක්ති උද්‍යානය පිහිටුවා වර්ෂ 10 ක් සපිරිම නිමිත්තෙන් 2022/09/24 දින රාත්‍රි පරිත්‍රාන පිරිත් දේශනයක් හා පසු දින මහා සංඝරත්නය 10 නමක් උදෙසා දානය පිළිගැන්වීමත් එම පරිශ්‍රයේ දී පැවැත්විණි.

මෙ අවස්ථාව සඳහා ශ්‍රී ලංකා සුනිත්‍ය බලශක්ති අධිකාරියේ අධ්‍යක්ෂ ජනරාල් ඉංජිනේරු අතුල ජයතුංග මහතා ඇතුළු නිලධාරින් සහාභාගි විය.         

සමස්ත ලංකා බෞද්ධ මහා සම්මේලනය, ශ්‍රී ලංකා නව නිපැයුම්කරුවන්ගේ සංගමය සහ ශ්‍රී ලංකා සුනිත්‍ය බලශක්ති අධිකාරිය විසින් සංවිධානය කරනු ලැබු පුනර්ජනනීය බලශක්ති නව නිපැයුම්කරුවන්, නවෝත්පාදකයින් සහ ආයෝජකයින් හමුව සහ ප්‍රදර්ශණය සැප්තැම්බර් මස 11 සහ 12 යන දිනවල කොළඹ 07 , බෞද්ධාලෝක මාවතේහි  පිහිටි  සමස්ත ලංකා බෞද්ධ මහා සම්මේලන මධ්‍යස්ථානයේදී සාර්ථකව පැවැත්විණි.

බලශක්ති සංරක්ෂණය හා බලශක්ති කළමණාකරනය පිලිබද නවොත්පාදකයින් සදහා   වේදිකාවක් සකසා දීම හා ඔවුන්ගේ නිර්මාණ ඉදිරියට ගෙන යාමට  ආයෝජන අවස්ථා සලසා දීම පෙරදැරි කර ගනිමින් මෙම වැඩසටහන දියත් කරන ලදී.

මේ සදහා  විදුලිබල හා බලශක්ති අමාත්‍ය ඉන්දික අනුරුද්ධ  මැතිතුමා, ශ්‍රී ලංකා සුනිත්‍ය බලශක්ති අධිකාරියේ සභාපති ඉංජිනේරු රංජිත් සේපාල මහතා සහ අධ්‍යක්ෂ ජනරාල් ඉංජිනේරු ජේ. එම්. අතුල මහතා ඇතුළු සම්භාවනීය අමුත්තන් රැසක් සහභාගී විය.

ජාතික ආධුනිකත්ව සහ කාර්මික පුහුණු කිරීම් අධිකාරිය, ශ්‍රී ලංකා සුනිත්‍ය බලශක්ති අධිකාරිය සහ සූර්ය පැනල මූලාකෘති නිෂ්පාදන ව්‍යාපෘතියත් එක්ව ආරම්භ කරන ලද සූර්ය ප්‍රකාශ වෝල්ටීයතා කාර්මික ශිල්පී පාඨමාලාවේ නිපුණ ශිල්පීන් සඳහා සහතිකපත් ප්‍රදානෝත්සවය, අධ්‍යාපන අමාත්‍ය ගරු ආචාර්ය සුසිල් ප්‍රේමජයන්ත මැතිතුමාගේ ප්‍රධානත්වයෙන් 2022.08.22 දින ජාතික ආධුනිකත්ව සහ කාර්මික පුහුණු කිරීම් අධිකාරියේ “නයිටා කැණිමඩල“ ශ්‍රවණාගාරයේදී පැවැත්විණ.

මෙම සහතිකපත් ප්‍රදානෝත්සවයේදී දිවයින පුරා මධ්‍යස්ථාන කීපයක සූර්ය ප්‍රකාශ වෝල්ටීයතා කාර්මික ශිල්පී මාස 18 ක පූර්ණ කාලීන පාඨමාලාව සාර්ථකව අවසන් කළ සහතිකපත්ලාභීන් 65 දෙනෙකු සඳහා ජාතික වෘත්තිය සුදුසුකම් (NVQ) සහතිකපත් ප්‍රදානය කරන ලදී. එමෙන්ම කොළඹ දිස්ත්‍රික්කයේ ආරම්භ කිරීමට නියමිත දෙවන කණ්ඩායම සදහා බඳවා ගැනීමද මෙහිදී සිදුවිය.

මෙම අවස්ථාවට අධ්‍යාපන අමාත්‍යාංශයේ ගරු ලේකම් නියෝජනය කරමින් අධ්‍යක්ෂ ජනරාල් (සැලසුම්) කුමාරි මීගහකොටුව, අධ්‍යක්ෂ ජනරාල් (පර්යේෂණ) ධර්මතිලක , ජාතික ආධුනිකත්ව සහ කාර්මික පුහුණු කිරීම් අධිකාරියේ සභාපති තරංග නලීන් ගම්ලත්, උප සභාපති මහාචාර්ය මහින්ද රූපසිංහ, අධ්‍යක්ෂ ජනරාල් ආචාර්ය ඩබ්.එම්.එස්. විජේසිංහ, ශ්‍රී ලංකා සුනිත්‍ය බලශක්ති අධිකාරියේ සභාපති ඉංජිනේරු රංජිත් සේපාල ව්‍යාපෘති සම්බන්ධිකාරක පද්මදේව සමරනායක, තෘතීයික හා වෘත්තීය අධ්‍යාපන කොමිෂන් සභාවේ සභාපති උදේනි වික්‍රමසිංහ, ජාතික සූර්ය පැනල මූලාකෘති ගුණාත්මක නිෂ්පාදන අධ්‍යාපනික පුහුණු ව්‍යාපෘතියේ අධ්‍යක්ෂ මහාචාර්ය සුදත් ආර්.ඩී. කාලිංගමුදලි, සිවනන්තන් රාසායනාගාරයේ නිර්මාතෘ සහ එහි සභාපති , චිකාගෝ හි පිහිටි Illinois සරසවියේ මහාචාර්ය සිවා සිවනන්තන් යන මහත්ම මහත්මීන් සහභාගි විය. තවද, සූර්ය බලශක්ති කර්මාන්ත ක්ෂේත්‍රය නියෝජනය කරමින් ආයතන හිමියන් සහභාගි වූ අතර ජාතික ආධුනිකත්ව සහ කාර්මික පුහුණු කිරීම් අධිකාරියේ අධ්‍යක්ෂ (පුහුණු) නිලන්ත ද සිල්වා මහතා ඇතුළු අධ්‍යක්ෂවරුන් සහ කාර්ය මණ්ඩලය ද සහභාගි විය.

නිවසේ බලශක්ති කාර්යක්ෂමතාවය හා පුනර්ජනනීය බලශක්ති පිළිබඳ ජනමාධවේදීන් දැනුවත් කිරීමේ වැඩමුළුවක්  2022/02/21  දින රජයේ ප්‍රවෘත්ති දෙපාර්තුමේන්තු පරිශ්‍රයේදී පැවැත්විණි.

ජනමාධ්‍ය අමාත්‍ය ගරු ඩලස් අලහප්පෙරුම ඇමතිතුමාගේ ඉල්ලීම පරිදි, ශ්‍රී ලංකා සුනිත්‍ය බලශක්ති අධිකාරියේ සම්පත් දායතක්වයෙන් මෙම වැඩමුළුව පැවැත්විණි. ජනමාධ්‍යවේදීන් හරහා බලශක්ති සංරක්ෂණය හා පුනර්ජනනීය බලශක්තීන්ගේ වැදගත්කම ජනගත කිරීම මෙහි ප්‍රධාන අරමුණ විය.

මෙහි  දේශණ සඳහා සම්පත් දායකත්වය ශ්‍රී ලංකා සුනිත්‍ය බලශක්ති අධිකාරියේ නියෝජ්‍ය අධ්‍යක්ෂ ජනරාල් , ඉංජිනේරු හර්ෂ වික්‍රමසිංහ මහතා, අධ්‍යක්ෂවරුන් වන ඉංජ්නේරු,  සනත් කිත්සිරි මහතා, ඉංජ්නේරු ඉරෝෂා කළුගලගේ මහත්මිය,  සහ ඉංජ්නේරු ප්‍රසන්න මල්දෙනිය යන අය විසින් සිදු කරනු ලැබීය.

නිවසේ බලශක්ති කාර්යක්ෂමතාවය පිළිබඳ බත්තරමුල්ල පුනරුත්ථාපන කොමසාරිස් ජනරාල් කාර්යාංශයේ කාර්ය මණ්ඩලය දැනුවත් කිරීමේ වැඩමුළුවක් 2022/02/17 දින පැවැත්විණි.

බ්‍රිගේඩියර් ප්‍රියංකර විදානගමගේ මහතා ගේ ඉල්ලී මත ශ්‍රී ලංකා සුනිත්‍ය බලශක්ති අධිකාරියේ සම්පත් දායකත්වයෙන් පැවති මෙම වැඩමුළුවේදී කාර්යාලයේ කාර්ය මණ්ඩලයේ සාමාජිකයන්ට තම නිවසේ බලශක්ති කාර්යක්ෂමතාව වර්ධනය කරගැනීමේ ක්‍රමවේදයන් පිළිබඳවත් කාර්යක්ෂම විදුලි උපකරණ හඳුනාගැනීම පිළිබඳවත් දැනුවත් කෙරිණි.

එමෙන්ම නිවසේ බලශක්ති භාවිතය අවම කර ගැනීම තුලින් තම ආර්ථිකයට ඇති යහපත් බලපෑම මෙන්ම රටේ සමස්ත ආර්ථිකයට හා පරිසරයට ඇති හිතකර බලපෑම පිළිබඳව දැනුවත් කෙරිණි.

මෙහි සම්පත් දායකත්වය ශ්‍රී ලංකා සුනිත්‍ය බලශක්ති අධිකාරියේ අධ්‍යක්ෂ, ඉංජිනේරු සනත් කිත්සිරි මහතා විසින් දරනු ලැබීය.

“හුළං මාමා” ළමා කාටුනය සඳහා මාස දෙකක් තුල ප්‍රේක්ෂක ප්‍රතිචාර ලක්ෂ 7 ඉක්මවයි.

අතිගරු ජනාධිපතිතුමන් අද දින එනම්, 2022/02/18 සුනිත්‍ය බලශක්ති ක්ෂේත්‍රයේ නියාමන ආයතනය වන   ශ්‍රී ලංකා සුනිත්‍ය බලශක්ති අධිකාරියේ නිරීක්ෂණ චාරිකාවක නිරත විය.

අතිගරු ජනාධිපතිතුමන්ගේ “සෞභාග්‍ය දැක්ම” ප්‍රතිපත්ති  රාමුවෙහි දක්වා ඇති පරිදි  2030 වන විට සමස්ත විදුලිබල උත්පාදනයෙන් 70%ක්  පුනර්ජනනීය බලශක්තිය යොදාගැනීම සාක්ෂාත් කර ගැනීම කෙරෙහි සොයා බැලීම මෙම නිරික්ෂණ චාරිකාවේ අරමුණ විය.

ආයතනයේ සෑම අංශයක්ම පෞද්ගලිකවම නිරීක්ෂණය කල ජනාධිපතිතුමන් එම අංශ වලින් බලශක්ති ක්ෂේත්‍රයට අදාලව සිදු කරන කාර්යන් පිළිබඳව සොයා බැලිනි.

සූර්ය බල සංග්‍රාම වැඩසටහන පිලිබඳ විශේෂ අවධානය යොමු කල එතුමා, සූර්ය බල සංග්‍රාමය යටතේ පියසි මත  සුර්යබලශක්තියෙන් ජාතික විදුලි බල පද්ධතියට එක් කර ඇති මෙගාවොට් 422 ප්‍රමාණය පිළිබඳව විමසා බැලු අතර ඉදිරියේදී මහා පරිමාණ සූර්ය බලාගාර  ඉදිකිරීමේ කාර්ය ද කඩිනම් කිරීම පිළිබඳව ද සාකච්ජා කෙරිණි.

වර්තමානයේ රට තුල  පැන නැඟි ඇති  බලශක්ති අර්බුදයට බලශක්ති කාර්යක්ෂමතාවය හා සංරක්ෂණය  දායක කර ගැනීමට ඇති හැකියාව සොයා බැලීම ද මෙහි දී සිදුවිය. නව පුනර්ජනනීය බලශක්ති ව්‍යාපෘති සඳහා අනුමැතිය ලබාදීමේදී සිදු ව ඇති ප්‍රමාදයන් සහ බාධාවන්  පිළිබඳ සොයා බැලීම සහ එම ව්‍යාපෘති කඩිනම් කිරීම ද  මෙම චාරිකාවේ තවත් අරමුණකි.

නිරික්ෂණ චාරිකාව සඳහා සුර්යබල, සුළං හා ජල විදුලි ජනන ව්‍යාපෘති සංවර්ධන රාජ්‍ය අමාත්‍ය ගරු දුමින්ද දිසානායක මැතිතුමන් හා අමාත්‍යාංශ ලේකම් වසන්තා පෙරේරා මහත්මිය ද, රාජ්‍ය අමාත්‍යාංශ ලේකම් හේමන්ත සමරකෝන් මහතා සහ විදුලිබල මණ්ඩලයේ ජේ්‍ය්ෂ්ඨ නිලධාරීන් කිහිපදෙනෙක්ද එක් විය.

 පුනර්ජනන විදුලි බල ශක්ති උත්පාදනය වෙනුවෙන් ඔබ විසින් නිර්මාණය කර ඇති නව නිපැයුම් හෝ බලශක්තිය කාර්යක්ෂමව හා සඵලදායී ලෙස භාවිතා කල හැකි නව නිපැයුම් හා නවෝත්පාදන සඳහා අතහිත දීමට අප සුදානම්.

ඔබගේ නව නිපැයුම් හා නවෝතපාදන අප වෙත යොමු කරන්න.

ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනතා අපේක්ෂාවන් යථාර්ථයක් බවට පත් කරලීම උදෙසා තමා වෙත පැවරෙන කාර්යන්, කාර්යක්ෂමව, සඵලදායීව තිර අදිටනින් යුතුව, උපරිම කැපවීමෙන්, අවංකභාවයෙන් හා මහජනතාවට පක්ෂපාතීව සපුරා ඉටු කරන බවට ප්‍රතිඥා දෙමින්, ශ්‍රී ලංකා සුනිත්‍ය බලශක්ති අධිකාරියේ සභාපතිතුමා , අධ්‍යක්ෂ ජනරාල්තුමා ඇතුළු සියළු නිලධාරීන් 2022 ජනවාරි 03 වන දින ආයතන පරිශ්‍රයේදී නව වසර වෙනුවෙන් වැඩ ආරම්භ කිරීම සිදු විය.

එහිදී, ශ්‍රී ලංකා සුනිත්‍ය බලශක්ති අධිකාරියේ අධ්‍යක්ෂ ජනරාල්තුමා සේවකයින් අමතා ප්‍රකාශ කලේ රටතුල ගොඩනැගි ඇති ආර්ථික අභියෝග හමුවේ අප සියළු දෙනා එක්ව බලශක්ති ඉලක්ක වෙත යාමට සාමුහිකව කටයුතු කරමු යන්නයි.

ඉන් අනතුරුව ආයතනයේ සේවකයින් ඇමතු සභාපතිතුමා ප්‍රකාශ කර සිටියේ අප වෙත පැවරී ඇති වසර 2030 දී දේශයේ බලශක්ති අවශ්‍යතාවයෙන් 70% ක් පුනර්ජනනීය බලශක්ති මගින් සපුරා ගැනීමේ ඉලක්කය වෙත යාමටත් 30% ක බලශක්ති ඉතිරියක් සාක්ෂාත් කර ගැනීමටත් කැප වන ලෙසයි.